Shillong, Naitung 10: Ka jingialang jongki Nongkitkam Shnong jong ki Shnong kiba shah pynngat haka MUDA kaba kynthup ia ka Mawlai, Pynthorumkhrah, Nongmynsong, Mawpat Umpling, Nongthymmai, Nongkseh, Umlyngka, bad Lawsohtun kaba la long hynnin ka sngi ka 09/07/2016 ka la ioh ban iakren halor ka jingpyntip ba la pynmih lyngba ki lad pathai khubor da u Secretary, Meghalaya Urban Development Authority kaba iadei bad ka Scheme airam shna їng bad pynbha ne pynkha їng kaba kot sha ka Rs. 6 lakh ha ka sut kaba 6.5% bad 1.5 lakh tyngka lyngba ka PMAY.
Ka kam ha kaba iadei bad ka jingkyntur pud ka MUDA ka dei ka issue kaba ka Synjuk ki Nongsynshar Shnong ka Bri Hynniew Trep ka la pyrshah ia ka jingpynrung ia kitei ki shnong ban pynhap ha ka MUDA bad ia kaba haduh mynta na ka liang ka Sorkar kam pat shym la leh ei ei ruh kaba long katkum ka jingiakren bad ka Synjuk ha ka 10/02/2016.
Wat haduh mynta ki їng kiba donkam ia ka light bad ka um, kim lah ban ioh khlem da leit shim ia ka occupancy certificate na ka MUDA, hynrei ka la wanrah shuh shuh da kane ka Scheme ban khring ia ki nongshongshnong tang kumno ban thaw ia ki lad ban pynrung ia ki shnong jongngi hapoh jongka.Ngim lah ban shah ia kane ka jingleh thombor jong ka MUDA ban pynrung jubor khlem da burom shuh ia ka jingpynsngew jong haba don ha kane ka ha ka ri synshar paidbah.
Ka jingialang kala shim ia kawei ka sur ba ba lei lei ngin ym pdiang ia ka Scheme, namar ki shnong ki hap ha ka Schedule Area ym ha ka MUDA.La shim ia ka rai ruh ba baroh ki Scheme bapher bapher khamtam kiba dei na ka Central Government haduh mynta ki dang wan beit lyngba ka C & RD ym na ka MUDA. Lada ka Sorkar ka don jingthmu ban ai ia kino kino ki jingiarap lane ki scheme, ka jingialang ka ai jingmut ia ka sorkar ba kan phah lyngba ka C & RD kumba ju leh.
Ha kane ka jingialang la shim ia rai ruh ban pyntip sha ka Synjuk ki Nongsynshar Shnong ka Bri u Hynniew Trep ba kan shim khia halor kane ka kam bad sha ka District Council kaba la pynkup bor da ka Sixth Schedule jong ka Riti Synshar jong ka Ri India ba kan shim khia ia kane ka kam, namar haduh mynta ki don hapoh ka jingkdup ka District Council. Ha kajuh ka por, ban pyntip ruh sha u Syiem bad ka Dorbar Hima Mylliem ba kan tip bad ba kan shim kano kano ka lad ba ka lah ban leh.
Ha ka juh ka por kin kyntu ia ki paidbah nongshongshnong ba kin ym bieit ia kane ka scheme. Kum ki Nongkitkam Shnong ngi sngewthuh ba ki don kiba donkam ban ioh ia ka jingiarap, hynrei kan ym dei pat lyngba ka MUDA. Kumta, ka Jingialang ka khot ia ka jingkyrshan kaba pura ba phin iatrei ryngkat ryngkat bad ki Nongkitkam Shnong khnang ban lait na ka jingshah pynkylla pyrdet ia ka Riti ka Dustur kaba la ju ia im baroh shikatta.
