Shillong, Jylliew 18: Ka seng Hynniewtrep Youth’s Council (HYC) ha ka jingialang jong ka Ectral executive Committee (CEC) mynta ka sngi kala pynlait paidbah ia ka kot jingthoh kaba la ai kyrteng “ Ki ain ban iada ia ki hok long trai Ri” ha kane ka kot ki don 15 tylli ki mat.
U Bah Robert K. Jahrin General secretary jong ka seng haba kren ha ki lad pathai khubor ha dien jong ka jingialang u la ong ba ka seng mynta kan sam paidbah ia kine ki kot sha baroh bad ban pan jingmut lem naki paidbah halor ki mat kiba ka seng kala thoh. La kyntu ia ki paidbah ba lada ki don ka jingsngewkhia na ka bynta ban iada ia ka jaidbynriew kin sngewbha ban ai ki jingmut jong ki bad ka seng kala buh por ba kin poi ia ka jingai jingmut hapoh ki lai bnai.
Ki khatsan tylli ki mat kiba ka seng HYC kala buh ha kane ka kot lyngkdop, ka innerline permit, ka residential permit ia ki ba shu wan ban shong shnong, ka khaii pateng da ki bym dei ki trai shnong, Ban khanglad ia ka jingia khaii beain ha ka kyrteng ki trai shnong, ka dei ban don ia ka khana samari lane ka State Permanent Citizenship Registration Act, Ka democratic Right kaba mut ban thep vote tang ki trai shnong.
Ka jingiapynbeit ia u pud u sam hapdeng ki jylla bad ka Ri ba marjan, Ki ain halor ka khyndew ka shyiap, ka Land Transfers regulation Act, Land Registration Act, Land celling, Land price and value regulation, protection and preservation of Riad Land, Land Survey and Record, ka jingkhang ban pyntrei kam ia ki ain jong ka sorkar pdeng, Special Economic Zone, linguistic right and eight schedule, Ka ain ba khlain ban iada ia ki kam bamsap, ban pynkylla ia ka sixth Schedule, State Custom and usage tribunal bad ka Hynniewtrep state hapoh ka Article 270. Kine ki long ki mat kiba ka seng ka buh ha khmat jong ki paidbah ba ki lah ban ia ai jingmut lang.
U Bah Robert, ha ba kren pat halor ka snem ot kyrteng, ka seng ka don ar tylli ki snem, ka wei ka dei ka 1951, kane ka long ba dei ha u ne u snem ba ka Ri India ka kala don ia ka khana samari kaba nyngkong, kawei pat ka snem ka dei 1971, kane ka dei ba ka Meghalaya ka ioh ia la ka jong ka jylla. Mynta ka shong ha ki paidbah ba kin ai jingmut lem ia ka seng snem aiu yn ia pdiang.
Haba ia dei bad ka jingpan jylla ka long ba ka seng ka pynshong nongrim halor ka ktien ka thyllij ha kaba ki Khasi bad ki Garo ki don la ka jong ka ktien ka thylliej bad ka riti dustur, ka HYC ka daw ia ka jylla la kajong katkum u pud u sam ba don mynta jong ki ar tylli ki District Council ka KHADC bad ka JHADC. Naka liang jong ka seng kan leit ban pynshai paidbah ia kine ki mat ha kylleng ka bri u hynniewtrep bad ha dien ba kala ioh ia ka jingai jingmut na ki paidbah kan sa leit ban ai ia ka memorandum sha u myntri rangbah ka jylla.
Ka seng HYC ka ong ba kane ka kam kam dei ka kam jong ka seng marwei ka dei ka kam jong ka jaidbynriew ,la khot la wer ia baroh ki seng bhalang bad ki riew paidbah ba kin ia snoh kti lang ha kane ka bynta na ka bynta ban iada iaka jaidbynriew.
