Shillong, Jylliew 10: Ka ophis jong u Syiem ka Hima Mylliem kala thoh shithi sha ka Deputy Commissioner jong ka East Khasi District ban pan jingbit ban khot ia ka jingialang jong ki rangbah shnong ka sor Shillong ban ia kren na ka bynta ki kam kiba bun.
Kane ka jingpan jingbit na ka ophis jong ka Hima Mylliem ka long ba ka hima ka kwah ban khot ia ka jingialang kyrpad iabaroh ki rangbah shnong jong ka Sor Shillong ban ia kren ia kiba bun ia ki kam kiba ia dei bad ka imlang sahlang.
Haba kren ha u SP News Agency na ka liang jong u Syiem jong ka Hima Mylliem u Pa’im Ainam Syiem u la ong ba kila pan jingbit na ka Deputy Commissioner bad mynta ki dang ap ia ka jubab na ka ophis jong ka DC.
Na ka liang jong u Syiem la iathuh ba ha ka shithi kaba la phah sha ka ophis jong ka DC kila ai ruh ia ka phang ba kin ia kren. La ong ba lada ka DC ka ai jingbit kin pynlong ia kane ka jingialang bad lada kim ioh jingbit kin hap ban sngap shuwa.
