Nongstoin Rymphang 10: Mynta ka sngi u Bah Witting Mawsor u la plie pyrda ia ka jingrakhe ia ka Jubilee Rupa jong ka Lai Shnong UPS Nongrynniaw ka dap da ka jingkmen kaba khraw. Kane ka jingrakhe kala pynphuh pynphieng da ka jingwan shim bynta jong ki paidbah nongshong shnong Nongrynniaw kynthup ia ki shnong ba marjan kum ka Nongmawngap, Mawngap-Kynjang, Nongrim Thawrat, Thangtngaw, Riangsiehkhon, Mawthung-Nongpdeng bad ka Riangsieh, ha ka jingdonlang jong ki 90 ngut ki khynnah skul.
U Bah Mawsor u ba long u Kongsan, ha ka jingkren jong u, ula pynshai shaphang ka jingkordor jong ka jingnang jingstad bad ula kyntu ruh ia ki khynnah skul ba kim dei ban duh jingkyrmen hynrei ki dei ban don ka jingthmu kaba jngai bha na ka bynta ka lawei jong ki. Ula bynrap ruh ba bun ki riew pawkhmat kila mih na ki Nongkyndong. Kumta ka jingdon jong ki ha nongkyndong kam dei ban pynduh jingkyrmen ia ki hynrei kidei ban tur shaphrang ban ialeh ia ki diengpynkiang ha ka jingim jong ki ban dup poi sha ka thong. Ha kane ka sngi u MLA u la air uh ia ka ‘Work Order’ ban shna ia ka Additional Building jong ka skul kaba long Rs. 200000/- tyngka, kum ka jingnoh synniang jong u na ka SRWP Scheme.
Ha kajuh ka por la ioh jingkren na u MDC u Bah Morningstar Mawsor ba lyngba ka jingnang jingstad kan wanrah ka jingkylla ym tang ha ki jaka sor hynrei wat ha ki nongkyndong ruh katkum ka juk science and Technology, kaba mynta. Hadien kata ula kular ruh ban noh synniang Rs. 5,00,000/- tyngka na ka bynta ban tih pynbha ia ka madan jong ka skul khnang ba ki khynnah skul kin ioh ban ialehkai.
Ha kane ka sngi la ioh ruh ia ka jingkren na u SDSEO, u Bah Edward Marngar, ha kaba ula pynpaw halor ka jingthrang jong ka Managing Committee ban Up-Grade ia kane ka skul na ka UP sha ka Secondary ba un sa leit rah ia kane ka phang sha ka Office jong u Inspector ba lada don ka lad un iarap lem kumno ban kyntiew ia kane ka skul. Ha kajuh ka por ula ai ruh ia ka jingkyrmen ba kane ka jingthrang jong ka Managing Committee jong kane ka skul kan urlong kloi namar ha kane ka dong ka thain kim don ki secondary school kiba marjan.
Nalor ka jingkren jong kitei ki Kongsan, la ioh ruh ia ka jingkren na ki riew rangbah ha kaba ia ka Welcome Speech la ioh ban kren da u Bah Andrias Dkhar Chairman jong ka SMC, Address jong ka Skul la pule da u Babu Peter Shemphang Rynniaw (Secretary Cum Headmaster) jong ka Skul, Past Pupli la kren da u Samla Bah Berjilius Rynniaw, History jong ka skul la pule da u Babu Robert E. Dkhar bad ia ka Vote of Thanks da I Babu Benis Rongrin.
La pyniaid ia ka prokram da u Chairman u Bah Fernandez S. Dkhar. Ha kaba nyngkong eh la plie ia u Mawnongrim jong ka Silver Jubilee da u Kongsan Shri. Witting Mawsor uba dei u local MLA jong ka Mawshynrut Constituency ha ka jingdonlang jong ki symbud Kongsan Shri, Morningstar Mawsor Local MDC bad u Sub-Divisional School Education Officer Shri. Edward Marngar ryngkat ki riew rangbah, Bah M. Umyiap President HSPDP Mawshynrut, Sordar Riangdo Shri. D. Nongrum, Sordar Lumpyngngad Shri. A. Marbaniang, Sordar Umsohpieng Shri. A. Nianglang, Sordar Nongrynniaw Shri. M. K.Snar bad baroh ki dkhot jong ka Managing Committee jong ka Skul ryngkat ki longkmie ki long kpa na ki shnong ba marjan.
