Shillong, Rymphang 08:Kum ka jingsdang ïa u mawjam na ka bynta ka thong bad ka jingthmu ka heprit ka ba dang 12 snem ka kyrta na nongkyndong ban long kum ka nongïaleh kai phutball ka batbit bad pawnam ka la ïoh kalad ban ïa don bynta bad ka ‘4forall Football Academy’ ka ba don ha Diengïong, Mawdiangdiang.
Ha ba ïoh ban ïakren bad kane ka khynnah, Deiphibakor Lyting ka la pynpaw ïa ka jingsngew tynad jong ka ban lehkai phutboll ka dei na duh ba ka dangrit bad ka la pynpaw ba ka jingioh mynsiem jong ka ka dei naka jingiohi ïa ka phutboll ha ‘youtube chanel’ bad ka la pyrshang ban leh kai marwei-marwei dala de ha ryngkat ki jingiarap ki para shnong.
“Nga dap da ka jingkmen ban ïoh kalad ban lehkai ha Shillong namar ha shnong nga ioh ba ialeh kai tang ha ki madan khyndew kat ba ha Shillong nga ïoh ban ïaleh kai ha ki madan phlang ba jyrngam ka ba dei ruh ha ka sien nyngkong” ka la pynpaw.
Ha ka jingïakren bad ka hymen arkmie jong ka heprit Deiphibakor, ka samla Manisha Lyting ka la iathuh ba ka heprit Deiphibakor kala sdang ban ïalehkai myllen tang bad la i para arkmie kynthei, hynrei kham hadien bad ki para khynnah shynrang kiba ïa ryngkat rta bad ka.
Ka la ïathuh ruh ba ha ka jingshisha ki bor pyniaiad jong ka Rangdajied United FC ki la khot ia kane ka heprit hynrei na ki daw jong ka jingbunkam ki khlem ïoh shuh ban ia kren kumta ki la poi ban ia kynduh bad u Bah Dawanshan Kharbudon u ba dei u trai jong kane ka ‘Academy’.
Kumban shu pyntiba ka heprit Deiphibakor Lyting ka dei ka khun ba-ar jong ka Kong Phalin Lyting bad kaba dang pule Klas – VII ha Nohron Presbyterian Upper Primary School kiba dei na ka shnong Nohron kaba ha Mawkynrew Constituency.
Ka jingpaw jong ka haka sap ïalehkai ka dei lyngba ka jingsaphriang ka wei ka ‘video’ ha ka rynsan social media halor ka jingdon sap jongka ban ïalehkai phutbol.
