Shillong, Jymmang 26: Ka National Institute of Fashion Technology (NIFT) Shillong ha ka sngi Balang ba la dep ka la pynlong ia ka jingpynkup burom kaba hynriew na ka bynta ki 60 ngut samla pule kiba la pyndep ia ka jingpule jong ki ha ka lain pule fashion bad design ha Sri. Aurobindo Institute of Indian Culture, Shillong.
Ki samla pule kiba la ioh pdiang ia ki degree ha kane ka sngi ki kynthup na ka Bachelor of Accessory Design, Bachelor of Fashion Design and Masters in Fashion Management. La don ruh ki jingai khusnam ba kyrpang ha ki kyrdan NIFT Best Academic Performance Award, NIFT Award for Meritorious Student bad NIFT Student of the Year Award.
U kongsan ha kane ka sngi u dei u Prof. S.K. Srivastava, Vice Chancellor jong ka skulbah NEHU ha kaba la ia don lang ruh u Dr. Shailendra Chaudhari, Managing Director ka NERCORMP kum u symbud kongsan.
Haba kren ha kane ka sngi, u Prof. Srivastava u la ai khublei kitbot ia baroh ki samla pule kiba la pyndep ia ki jingpule jong ki bad u kyrmen skhem ba kin long ki nongtbeh sharak kiba thymmai ha ka fashion design bad teknoloji. “Ka jingialeh ban pyniaid iew ia ka fashion ka jur bha bad kumta ka donkam ba ki designer kin pyrkhat thymmai bad leh thymmai ia kiei kiei khnang ba kaei kaba ki pynmih kan long kaba iaid iew,” u la ong.
U la ai ka jingiaroh ia ka tnat Ministry of Textiles jong ka sorkar India hapoh ka jingialam jong ka myntri kane ka tnat, ka Smriti Irani namar ka jingtrei shitrhem jong kane ka tnat ban kyntiew ia ki kam pynmih jain ha ka ri bad khamtam ban kyntiew ia ki rukom shna pynwandur bad thain jain tynrai ka ri India.
Ha shuwa kane, la ioh ia ka jingpule ia ka kaiphot ba shisien shi snem 2016 – 17 jong ka NIFT Shillong da u Director jong kane ka Institute u Col. Subroto Biswas (Retd.). Ka la don ruh ka jingpyni nam ia ki tiar ki tar ba la shna da ki samla pule bad ka fashion show “Fashionova” kum shi bynta jong ka prokram. La pynkut ia ka Convocation’17 da ki kyntien ai khublei da u Joint Director (I/c) jong ka NIFT, Shillong, u CA Mrinal Sajwan.
