Shillong, Iaiong 19: u Bah Vincent H Pala MP jong ka 1-Shillong ba dei ruh u secretary general jong ka kynhun ki MP kane ka thain shatei lam mih ngi jong ka Ri India u la phah da ka shithi sha u myntri rangbah duh jong ka Ri India ban pynkylla surok bah ia ka surok na Umtyra ha Meghalaya sha Lubang sha karbi Anglong ha Assam.
Ha ka shithi kaba la phah u bah Pala la ong ba katei ka surok na Umtyra, Semasi sha Nohkhara kiba hap hapoh Meghalaya bad ka poi sha Lubang kaba hap hapoh jong ka Karbianglong jong ka jylla Assam dei ban pynkylla ia ka sha ka Surok bah.
Kane ka surok kan jrong 40 km bad kan wantah ka jingmyntoi ia ki paidbah kiba im ha baroh arliang jong ka jylla Assam bad Meghalaya da kaba shna ia ka jingkieng lyngba ka wah Kopli bad pyniasoh bad ka NH-6 ha Meghalaya.
Ka jingkwah ban pynkylla surok bah ia katei ka surok ka long ban lait na ka jingdheng kali namar ha surok Sunpur ka juh don ka jingtwa khyndew kaba man ka por, lada don sa kane ka surok kum ka surok bah kan iarap ha ka leit ka wan sha ki bynta ba sharum ka jylla Assam, maipur, Mizoram, Tripura bad Nagaland.
Kane kan pyniasoh ruh iak a Karbianglong bad ka kad khaii kaba don ha Meghalaya sha Bangladesh, kane kan iarap ha ka khaii pateng ia u Mwshun, dewiong ki dieng bad kiwei kiwei. Kane kan iarap ban kyntiew ia ki kam jngohkai pyrthei sha ki jaka ba itynnad kiba don ha East Jaintia Hills District.
U MP jong ka 1-Shillong u la kyntu ia u myntri rngbah duh jong ka Ri India ba un phah pynkhreh ia ka jingkhien kaba bniah ha kaba ia dei bad katei ka surok bad ka tnad shna surok jong ka sorkar pdeng na ka bynta ka jingmyntoi ki paidbah kiba ia um ha khappud ka Meghalaya bad Assam.
