Shillong, Nohprah 02: U Bah Shibun Lyngdoh president jong ka seng BJP Meghalaya state Unit mynta ka sngi u la pynlait paidbah ia ka kular election jong ka seng BJP na ka bynta kane ka Election MDC Shiteng samoi kaban long ha ka 13 tarik mynta u bnai.
Ki kular kiba ka BJP kala buh ha khmat jong ki paidbah ba kin bihsar bniah ki long san tylli, ban pynioh ia ka song pisa na ka sorkar pdeng sha ki District Council, Ban pynkhlain ia ki skul rit hapoh jong ki District Council, ban wanrah ia ka ain synshar shnong, ban pynneh pynsah ia ka rukom bat khyndew bat shyiap bad ban kyntiew ia ki kam jngohkai pyrthei khlem da ktah ia ka mariang.
Haba kren ha ki nongthoh khubor ha dien ba la pynlait paidbah ia kane ka kular elelction, u Bah Lyngdoh u la ong ba ka jingiashim bynta jong ka seng BJP ha kane ka MDC shiteng samoi ka long ban pynshai paidbah ia ki skhim kiba ka sorkar BJP kala leh na ka bynta jong u paidbah ia kaba ka sorkar jylla kam shym la ai jingtip sha ki paidbah.
Haba ia dei bad ki skul ha ki District Council u Bah Lyngdoh u la ong ba kane ka long kaba don kam ban pynneh synsah iala ka jong ka ktien tynrai da kaba hikai ia ki ha ki skul rit bad kumba ka long mynta ki skul baroh kila sdang da u ABCD ym kum ha kip or mynshuwa ABKD.
Halor ka ain VAB, u la ong ba ka BJP ka kwah ba ia ki dorbar shnong dei ban ithuhnoh da ka ain, hynrei kadei ban long ryngkat ryngkat katkum ka riti synshar jong ka Ri, ka seng lada ka jop ha kane ka election kaba mynta kan ialeh ban pynurlong noh ba ka VAB ka dei ban long ai noh.
U Bah Shibun u kyntu ia ki paidbah ba kin ai ka jingkyrshan ia ka seng BJP hapoh ka jingialam jong u myntri rangbah duh jong ka Ri ban wanrah ia ka jingkylla ha ka ioh ka kot ha ka Ri bad kane ka jylla Meghalaya u la ong.
