Shillong, Nailur 23: U shnongknor jong ka iing dorbar thawain ka jylla u AT Mondal mynta ka sngi u la pynlait paidbah ar tylli ki kot ha Assembly Hall, kaba la ai kyrteng ka “P.R Kyndiah as I know him” bad ka “ Meghalaya”.
Ia kane ka kot kaba ia dei bad u bah PR Kyndiah bam kwai ha dwar u Blei, la lum lang ia ki jingkren jong u baroh hapoh iing dorbar thawain ka jylla ha ka por ba u long kum u MLA, bad ia ki rai kiba u shim ha ka por ba u long u shnongknor jong ka iing dorbar, kaba kongsan eh ka long halor ka jingmait kyrteng ban pynduh ia ka jinglong dkhot jong ki MLA shimet, ia kane ka jinglum thup la leh da u bah Andrew Siamon, u ba dei ruh u Commissioner secretary jong ka iing dorbar thawain ka jylla.
Kawei pat ka kot kaba la pynlait paidbah ha kane ka juh ka sngi ka dei kaba la ai kyrteng “Meghalaya” ia kaba la thoh da ka kong Dr Ibanrikenti Ranga bad u Dr S. Sharma jong ka skul bah North Eastern Hills University. Kane ka kot kadei kaba thymmai kaba la thoh ha dien ba la pynkha sa saw tylli ki District thymmai ha kane ka jylla.
Haba kren kum u kongsan u shnongknor jong ka iing dorbar u Mondal, u la ong ba u bah PR Kyndiah u dei shisha u riew khraw bad kane ka kot kan iarap ia ki MLA bad kum juh ia kito ki samla kiba don ka jingthmu ban ia khun ia ka kam MLA, dei na ka jingkhraw ba la thung ia u kum u Lat bad ha dienb ba la wan phai biang sha ka sain pyrthei u la long u myntri cabinet ha ka sorkar pdeng.
Halor ka kot “Meghalaya” u la ong ba kane ka dei ka kot kaba thymmai kaba la thoh hadien ba ka jylla kala ioh sa saw tylli ki District thymmai bad kane kan iarap shibun iaki briew jong ka jylla, ki samla pule bad ia ki riew wad bniah bad ia ka jylla hi baroh kawei.
Ha ka jingkren jong u Bah Waibha Kyndiah, khun jong u Bah PR Kyndiah, u la pynpaw ia ka jingsngew kmen ban iohi ba kane ka kot kaba u kpa jong u angnud ban pynmih mynta kala urlong u ai khublei iau Bah Andrew u ba la trei shitom ban pynurlong ia kane ka jingkwah u kpa jong ki, “ Nga sngew kmen ban iohi ba ia kane ka kot la pynlait mynta ka sngi”
U Bah Andrew Saimon, u ba la lum thup ia ki jingkren jong u Bah PR Kyndiah u la ong ba kala shim por ia u mynta la kumba hynriew snem ei ei ban pyndep ia kane ka kot , ha kane ka kot ki kynthup ia ki jingiakren ki jong u hapoh ka iing dorbar bad khamtam eh ha kaba ia dei bad ki Rai kiba u la ai ha ka por ba u longu shnongknor jong ka iing dorbar thawain jong ka jylla. Ha kane ka sngi ka myntri ba dei peit ia ka koit ka khiah ka kong Roshan Warjri ruh kala ia don lang.
