Shillong, Risaw 16: Ka Bansara Eye Care Centre ryngkat ka jingiatrei lang ka Society for Promotion of Eye Care and Sight (SPECS), World Diabetes Foundation, Khasi Student’s Union (KSU), West Khasi Hills lem bad ka Synjuk Ki Seng Longkmie Nongstoin, kala pynlong ia ka jingiaid paidbah ha kaba la ia shim bynta da palat 200 ngut ba kynthup ruh ia ki khynnah pule na ki skul bapher baher ban rakhe ia kane ka sngi ha Nongstoin.
Ia kane ka jingiaid paidbah la sdang naka Ophis PWD New Nongstoin bad la pynkut ia ka ha Bishop’s Cathedral. Hadien kane la pynlong ia ka jingialang kaba la long ha Bishop’s Hall da ka jingthmu ban ai jinghikai bad pyntip sha ki nong shong shnong ka thain khamtam ki khynnah pule shaphang ka jingsumar khmat, ka jingkordor ki khmat, ki jingeh bad ki jingiada ia ki jingpang khmat. Ha kane ka rynsan la ioh ban iadon ryngkat ruh bad U BDO Nongstoin Bah V. Swer kum u Kongsan ka jingialang ,u DMHO Dr. W.W. Phira, u Gen. Secretary KSU West Khasi Hills district bad u Senior Faculty Bansara Institute of Optometry Science (BIOS) Bah Anton Decruse.
Ki nongwan iashim bynta ha kane ka jingialang ka kynthup ia ki dkhot ka Khasi Student’s Union West Khasi Hills, ki dkhot ka Synjuk ki Seng Longkmie Nongstoin, ki samla pule ka Bansara Institute of Optometry Science Shillong, ki khynnah skul ka thain lem bad ki nongtrei ka Bansara Eye Care Centre Shillong.
U Kongsan ha kane ka sngi u la pynpaw ia ka jingsngew khia ha kaba iadei bad kane ka jingpang kaba lah ban pynthut ia ka jingim u briew shimet bad kumjuh ruh ia ka imlang sahlang. U la iawer ia baroh ban pynphriang ia kane ka jingtip kaba long ym tang ia ki jingeh hynrei kumjuh ruh ia ki lad jingsumar kiba lah ban iada na ka jingmatlah. U DMHO ruh u la pynpaw ba katkum ki jinglum jingtip la lap ba bun ki khynnah ka thain ki don ia ka jingpang Night Blindness naka daw ka jingduna ia u Vitamin A, kaba ju tip ruh kum ka pang mat ‘yiar kaba donkam bha ia ka jing kitkhia ha ka rukom bam.
U Gen. Secretary Khasi Students’ Union West Khasi Hills u la ban khia halor ka jing pynsaphriang ia ka khubor ban sumar khmat bad ban burom ia kito kiba don ia kane ka jingshitom. U Senior Faculty ka Bansara Institute of Optometry Science Bah Anton Decruse u la ong ba don kumba 30,000 ngut ki briew ha ka jylla kiba matlah bad 1 lak ngut pat ki don ia ka jingpang matlah kaba lah ban pynkhiah ne ka Avoidable Blindness. U la pynpaw ruh ba ki khynnah bad kiba la san kumjuh ki lah ban don ia kane ka jingpang kaba lah ban ktah ruh lyngba ka jingpang shini ne diabetes. Lada sngewdon kano kano ka jingeh ha ka bor iohi u la kyntu ban leit sha ki jaka sumar ban ioh ia ka jingiarap.
Ka World Sight Day ka dei ka sngi ba ka pyrthei satlak ka rakhe ha man ka Sngi Palei ba ar jong u bnai Risaw man u snem bad ha une u snem ka World Sight Day, la ioh ban rakhe ha ka 13 tarik u Risaw ryngkat ka Phang Pdeng, “Stronger Together” (Ka jingkhlain haka jingiasnohlang) ha Nongstoin.
