S
hillong, Nailar 25: Ka seng ki nongniah Bike ia kaba kila jer kyrteng ka “The Ultimate Legend Bikers Association” mynta ka sngi kila pynlong ia ka “Bike Rally” ban ai ia ka jingkyrshah ia ka KHADC(Khasi Social Custom of Lineage) 2nd Amendment Bill, 2018. Ia kane ka jingiaid paidbah la sdang na Madan Student bad pynkut sha jan iing jong u Lat ka jylla.
Ha ka jingkren u Bah Seibor L Nonglait President jong ka seng u la ong “ Ngim don kano kano ka daw ban pyrshah ia kiwei, hynrei ngi don ia ka daw ban iai da ia la ka jong ka jaidbynriew. Kum ka seng ka ai khublei ia baroh ki MDC kiba la wanrah ia kane ka Bill khamtam eh ia u CEM jong ka KHADC u Bah HS Shylla.
Na ka liang jong ka seng kam don ei ei ban ong pyrshah ia kito kiba pyrshah ruh namar ha ka jingialeh hap ban don, hynrei kin nym kynthoh ei ei. Ka seng ka ieng skhem halor ka nongrim ban ai ka jingkyrshan ia ka KHADC ba kane ka Bill ka dei ban long ain noh kloi ban iada ia ka jaidbynriew.
Ha ka jingkren jong u Bah Balajied Lawryniang Secretary jong ka seng shuwa ban sdang ka jingiad paidbah, u la ong ba kum ka jaidbynriew khasi ka shim jaid na ka kmie bad kiba bun ia ki jaka pule la ai sha ki kynthei, hynrei lada wan u paduh da uwei kaei kaba jia ia ki paheh.
La ong ba ka jingdon jong ka Meghalaya Land Transfer Act kam don jingmyntoi ei ei ruh em namar ia ka jaka la thied ha ka kyrteng jong ka tnga khasi. Kum ki samla ki kmen ban iohi ba ki nongialam hapoh jong ka KHADC ki wanrah ia kane ka Bill ban iada ia ka jaidbynriew. Kum ka seng ka duwai ba un lah ban pynlong ain noh kloi ia kane ka Bill.
Ha kane ka sngi palat spah ngut ki dkhot jong ka seng kila ia mih ryntih ban iaid paidbah ban ai ka jingkyrshan ia ka Bill jong ka KHADC, ha ryngkat ka riam ka beit tynrai ban pyni sha ka pyrthei ba ka seng ka kwah ba kane ka Bill kan long noh ka ain ban iada ia ka jaidbynriew.
