Shillong 27, Iaiong: Ki samla, khynnah bad ki tymmen kumba 150 ngut ki
la pyndep ia ka jingiaid kjat kaba lai kynta tam eiei naduh Janiaw ban
krih ia ki pyntha ka Mawlyngbna bad shaduh shnong Lawbah ha kane ka
sngi Saitjain. Ia kane ka jingiaid kjat la pynlong da ka Youth Hostel
Association of India (YHAI), Meghalaya Branch.
Ha kane ka jingiaid kjat kaba jlan bad shit sngi bha, ki nongiaid pat
ki la kmen bha namar ba hapoh ki lynti iaid, hapdeng ka khlaw la lap
bun kiei kiei ki jingbuh jingsat bad ki jingthaw jong ka mariang.
Mar ia iuhkjat, tang hadien katto katne, la lap nyngkong u syntiew
Pitcher Plan uba kham bna nam bha, la iaid lyngba ia ki wah rit bad
wah ba heh ha pyntha ka Mawlyngbna.
Hapdeng kane ka jingiaid lynti, la lap ruh ia ki fossil ne ki dak ki
shin ba la paw ha u maw ha ka dur jong ki jingthaw ba im ha duriaw.
Ka lynti kam long kaba jlan hynrei ka long madan bad ka don u thiep
bar it tang hyndiat eh, bad ka don ki jaka ba duna dieng bad ka don ki
jaka ba lap ia ki dieng bah eh bad ba tngen bha. Namar kane, ka la
pyntngen shisha ia ki nongiaid kjat namar ba ki ioh mad ia ka jinglong
ka mariang bun rukom.
Kaba sngew khampher ia ki nongiaid, ka long ba la lap ia ka Iew Luri
Lura jong ki mrad Hyndai Hynthai kaba la sakhi da ki dak ki shin
jongki ha kawei ka jaka ba khot ka Iangtaser. Ia ki dak kjat jong ki
mrad, la lap halor jong u mawsiang bah eh bad ba iar bha kaba la ong
ba ka dei ka iewluri lura ki mrad hyndai ha kane jaka. Ka don ruh ka
wah sngur hajan kane ka iew.
Shuh shuh, ka pynkmen bad pynsngew tynnad ia ki nongiaid kjat ba lap
ia ka ksaid kaba itynnad ha Umdikain, kaba pyrsad lyer ban pynjah shit
bad ruh ban iohi ia ka pung ha Mawlyngbna ka jaka kaba long kum ka
jaka khwai ruh.
Ha kane ka pung ha Mawlyngbna, la pynlong ia ka jingialang ha kaba la
sam ia ki syrnod sha ki nongshim bynta bad la batai ruh shaphang ka
jingmut ba pynlong ia ka jingiaid kjat bad la shim bynta ruh ki
nongiaid kiba la pynpaw ia ka jingkmen ban ioh ia kane ka lad lyngba
ka jingialam ka YHAI.
Ki nongpyniaid ka YHAI, ki la ong ba ka jingpynlong ia kane ka
jingiaid kjat, ka long ban ieid ia ka mariang, ban pynneh pynsah ia ka
jingbuh jongka, ym ban pynjot, ka long ruh ban wad ban shem ia ki
jingdon ha ka mariang.
Hadien ba la pyndep nangne, la pynlong ia ka jingleit peit ia ka pung
ba kyrsoi na ka thliew bah kaba don ha shnong Lawbah, bad nangne,
baroh la wan phai biang da ka jingkmen da ka jingkhmih lynti ban ioh
biang kum kane ka jingiaid kjat ha kawei ka por.(SP News)
