Shillong, Jylliew 27: U myntri rangbah ka jylla u Dr Mukul M Sangma mynta kala sngi u la pynrem jur ia ki nongpyniaid jong ka Delhi Golf Club kiba la kren bein ia ka thei khasi ka long Tailin Lyngdoh ha Delhi, ia kane ka jingleh yn nym lah ban pdiang ban kren bein ia ka rain ka beit jong kiwei pat ki briew.
U myntri rangbah ka jylla kaba u don mynta ha Delhi, u la kren ha ki lad pathai khubor ha kaba ia dei bad kane ka jingjia , ka long ka jinglehrain ia kito ki briew ba ki kim tip ia ka jinglong jingman jong ki jaid bynriew kiba don ha kane ka Ri kaba khraw, kajingpynrem ka long na ka bynta kito ki briew ki bym tip ei ei bad dei ban pynshitom ia ki katkum ki kyndon ain jong ka Ri.
U myntri rangbah u kyntu ia u myntri khynnah kam poh iing jong ka Ri India u Kiren Rijiju bad ia ka tnad kam poh iing ba ki dei ban tip ia kane bad kane ka jingleh ka long kaba yn nym lah ban pdiang bad kane ka dei ka jingniew bein ia ki rit paid, khamtam ia ki kynthei briew bad ka sorkar kala dei ban register case ia kane khnang ba kiwei ha dien kin nym mlien shuh.
U Dr Mukul u la ong ba kum kane ka jingleh ban niew bein ia ki wei ki jaid bynriew ba kane kala jia na ka por sha ka por, hynrei kane ka jingjia ia kane ka thei khasi kaba la dei ka long kmie ka long kaba kham pher bad dei ban pynshitom ia kito ki briew hapoh jong ka ain Scheduled Tribe Prevention of Atrocities Act 1989 bad ka hok nongkynti katkum ka riti synshar jong ka Rib a kum kine ki jingjia kin nymjia shuh ha dien ha but.
