New Delhi, Iaiong 25: Kila don ki jingthoh ha kine ki sngi ha kaba la ong ba ka sorkar pdeng ka pyrshang ban pynbor ban pyndon kam ia ka ktien Hindi, da kaba shim ia ka rai jong ka tnad kam poh iing jong ka sorkar pdeng kaba dei peit ia ka rukom kren ia ka ktien sorkar ha kaba la kynnoh ba kito kiba nang ban kren ia ka ktien Hindi kid ei ban kren da ka ktien Hindi.
Haba ia dei bad kane ka jingkynnoh na ka liang jong ka sorkar pdeng mynta ka sngi ha ka jingpynlait khubor lyngba ka tnad paidthai khubor jong ka sorkar pdeng kala pynshai paidbah ba kam shym don kaba kum kata ka jingthmu ban kren ia ka ktien Hindi da ki heh sorkar.
Ka Committee jong ka Parliament ha kaba ia dei bad ka ktien sorkar ia kaba la thaw ha u snem 1976, haduh mynta kala ai khyndai tylli ki kaiphot, ia ka kaiphot kaba khyndait la ai sha u presidentjong ka Ri India ha ka 2nd u bnai Jylliew 2011, ha kaba u Chairman ba rim jong ka committee u la ai haduh 117 tylli ki jingai jingmut.
Ha shuwa ban ai ia kane ka kaiphot la khot ia baroh ki tnad jong ka sorkar pdeng ban ia mir jingmut ha kaba ia dei bad kane ka phang bad la pdiang ia ki, kane ka jingkynnoh ban ong ba ka sorkar pdeng ka kwah ban pyndon kam ia ka ktien hindi ka dei ha ka jingai jingmut kaba 105 bad kane ka ong kumne “ Baroh ki heh sorkar , kynthup ia u president jong ka Ri, ia ki myntri sorkar pdeng kiba lah ban thoh bad kren ia ka ktien Hindi, la kyprad ia ki ba kin kren lane thoh ha ka ktien Hindi”
Ka sorkar pdeng ha ba pdiang ia kane ka jingai jingmut kala phah ia kane ka rai ha ka 31 tarik jong u bnai Lber 2017, bad kane ka jingai jingmut jong ka committee kala shai kdar bad ka dei tang ka jingkyrpad kam dei ka jingbethah. Ia kane la leh katkum ka riti synshar jong ka Ri ban kyntiew ia ka ktien sorkar hapoh jong ka Ri, ka jingmih khubor ka long kaba khlem don nongrim ha ei ei ruh.
