Shillong, Lber 11: Ka seng HYC seng kmie mynta ka sngi kala pynpaw shai kdar ba ka phah ia kane ka kyrwoh sha baroh ki kynhun ka sorkar pdeng ne ka sorkar jylla bad iaki riew shimet ban sangeh shisyndon ia ka jingthmu ban tih Uranium da kaba pynbiej paidbah.
Na ka liang jong ka seng ki ieng skhem ha ka nongrim bad ka jutang ba kila khlei da lei lei ruh em kin nym shah ban khlong ia une u marpoh khyndew na Ri Khasi bad ia kane kila dep ban kren shai naduh ki snem bad kisngi kiba la dep.
Ki kren ruh dakaba shai ba kum ka seng bad ki dkhot jong ka seng baroh ki long kiba la kloi ban ia khun da kano kano ka lynti ban pynthikna ba ka sorkar pdeng ne ka sorkar jylla kan nym dei ban ioh lat ban pyrshang ban toh Uranium namar kane kan sa pynduh jait ia ka jaidbynriew.
Ka Seng ka pynrem jur ia kato ka briew kaba kyrteng ka Elizabeth Nongbri bad ia kiwei ruh, ba kam dei ban pyrshang mushlia lap lah ia kane ka kam iap kam im jong ka Jaid bynriew.
Ka HYC ka ka shim ba lehse kane ka briew ka kwah ban sngewthuh iaka Sur jong ki khun samla bad ki dkhot ka Jaid bynriew bad hadien pat ka pyrshang ban lennoh ia kaei kaba kala dep ban thoh.
Ka HYC ka ong ba to tip tang kawei ba kum ki Seng bhalang ne ki kynhun bapher bapher, k lah ban don ia shibun ki jingiapher ha ki lama ba ki don, hynrei ki long kawei ka jingmut bad ka jingthmu bad “kata ka long ban iada bad pynneh pynsah bad khamtam eh ban ialeh khlem kynryndan dien na bynta la ka Jaidbynriew” kane kalong katkum ka kyrwoh kaba la phah da u bah Roy Kupar Synrem Presdient ka seng HYC seng kmie.
