Shillong, Kyllalyngkot 29: Ka seng samla shnong Umsawkhwan, haba ia dei bad ka khubor bamsap khlaw Mawphlai kaba la paw ha ki lad pathai khubor ha ka 28 tark mynta u bnai,na ka liang jong ka seng samla Umsawkhwan ka paw pynpaw ia ka jingsngew pyrshah kaba jur ia ka jingkam u Bah Paul Lyngdoh ia katei ka jaka Lum Mawpalai ba ka dei ka jaka jong ka sorkar.
Kumta ka seng samla shnong ka pynshai sha u tei u briew ia katei ka khlaw Mawpalai la long trai da ka shnong Umsawkhwan na duh ki por ba rim ba jah bad ym da ka sorkar. Dei ha u snem 1953 ba ka shnong Umsawkhwan kala aiti ia katei ka jaka sha ka Jhum Control department jong ka sorkar Assam ha kato ka por na ka bynta ka project thungdieng jong ka bad ia katei ka kam la leh ryngkat bad ka jingiakut lane ka soskular ba ha dien 30 snem na u tei u snem 1953 ba ka sorkar ka dei ban pynphai ia katei ka jaka sha ka shnong. Ha dien ba ka jylla Meghalaya ka jong ka jylla la jong, ia katei ka jaka la shimti da ka soil and water conservation Department jong ka sorkar Meghalaya tang ban pyniaid ia ka project thung dieng ym ban long trai halor katei ka jaka.
Ka seng samla shnong ka pynshai ba la ri la sumar bad la buh tyngka da ki long shuwa jong ngi naduh kip or ba mynshuwa na ka bynta ka jingmyntoi jong ngi ki long dien man dien haduh mynta mynne ngi kum ka shong ka thaw ngi don da ki shakhi satar bad ki dulir kiba biang bad dei halor ka jingdon ia katei ki kot ki sla ba biang wat ka High Court ruh kala pynksan ia ngi ka shnong Umsawkhwan ba ngi long trai halor katei ka khlaw Mawpalai.
Ka seng samla Shnong Umsawkhwan ka pyrshah jur ia u tei u juh u briew u ba kren ieit ri mynba u dang long nongialam seng bhalang ha kaba u juh kren ban iada ia ka jaidbynriew ka shyiap jong ki paidbah trai Ri trai muluk hynrei une u juh pat u briew pat u ba kwah ban pynkylla khongpong ynda u la don ha ka bor ban knieh noh ia ka khyndew ka shyiap kaba long ka nongtynmen kaba dei hok jong ki paidbah. Kum ka seng samla shnong ka pyrshah jur ia u tei u briew , Ka seng ka pyrshah ruh ia ka jingkem ia u Bah SW Rymbai bad ka jingkynnoh bamsap ia u bad ka dorbar shnong Umsawkhwan ka long ka bym don nongrim haei haei ruh hynrei ka dei tang ka jingthmu pynjahburom bad pynthohbria bad kane ka lah ruh ban long ka buit ban ioh myntoi politk.
Shuh shuh ka seng samla shnong Umsawkhwan ka pynshai paidbah ba naduh mynshuwa haduh mynta kam shym la don kata ka shnong lane ka dor bar shnong Mawpalai kumba la paw ha ki kot khubor ha kine ki sngi ba la dep. U Lum Mawpalai u don hapoh u pud u sam bad hapoh ka jingpeit jingkhmih bad jinglong trai jong ka shnong Umsawkhwan.
