Nongpoh, Kyllalyngkot 29: Ka jingïakob Mrs. Ri Bhoi kaba long ha ka sien kaba nyngkong bad kaba la pyniaid da ka Women Organisation of Ri Bhoi District (WORD) ka la ïohpdiang ïa ka jingkyrshan kaba pura na ki paidbah khamtam na ki long kmie katei ka district kiba la wan ban sakhi ban tip ïa ka jingmut jong ka.
Ha kane ka jingïakob, 19 ngut ki longkmie na kylleng ka thaiñ Ri Bhoi ki la ïashim bynta ha kaba lai ngut ki la long ki nongjop bad ladon ruh ka jingai khusnam kyrpang ha ki 5 bynta kumba ju leh ha ki jingiakob thei bhabriew.
Ïa ka nam 1st Ri Bhoi la rah da ka kong Menarisha Sohphoh na ka shnong Umsamlem, ka first runner up la rah da ka kong Mary Jones Diengdoh na Lumnongrim Umsning, second runner-up la rah da ka kong Lakyntiew Syiemlieh na Lumumpih Umsning.
Ia ka nam Mrs. Beautiful smile la jop da ka Biyorist Thangkhiew na Nongjri, Mrs. Cat Walk da ka kong Aibianglin Lapang na Nongjri, Mrs. Photogenic kong Livaralis Mawrie na Pahamsyiem Nongpoh, Mrs. Beautiful eyes la ioh da ka kong Lakyntiew Syiemlieh na Lumumpih bad Mrs. Perfect ten la jop da ka kong Sinaris Lyngdoh na Umsamlem.
Ïa kine ki longkmie la bishar da ka jingdon jong lai ngut ki nongbishar kiba kynthup ïa ka Mrs. Asia 2015 ka Nupur Saigal, ka 1st Miss Ri Bhoi kong Samaria Pathaw bad ka 2nd Runners Up jong ka Miss Winter Queen 2015 Ibapynhun Eve Syiemlieh.
Kane ka jingiakob Mrs. Ri Bhoi ka la lah pynsuhthied sha ki paidbah halor kaei ka jingdonkam ban ithuh kyrpang ïa ki longkmie, khynnah namar ïa ki jingkylli ba la kylli ïa longkmie kiba la shim bynta ka long bad ka jingdonkam bad ka kamram jong ki longkmie ha iing ha sem, ha ka imlang sahlang, ka lynti ban ialeh pyrshah ia ki kam shah thombor ki kynthei, ka kamram jong ki longkmie ha ka jingiadei bad ki rangbah, ki samla shynrang bad kumjuh ruh ki la don ki jingkylli haba iadei bad ka jingdonkam jong ka jingpule bad kiwei kiwei.
Hashuwa kane la ioh ruh ia ka jingbatai bniah bad ka jingthmu jong ka WORD ban pynlong ïa ka Mrs Ri Bhoi na u Adviser ka seng, u bah Kyrmenlang Uriah uba long ruh u nongshong shnong na kane ka thaiñ.
Ha katei ka sngi, kiba la ïadonryngkat ki kynthup ia u MDC ka Umsning bah Donkupar Sumer, MDC ka Mawhati bah James Sylliang, ki ADM na ka ophis u Deputy Commissioner, ki ophisar na ki tnat sorkar kum ka PHE, Soil and Water Conservation, Water Resources, na ka ophis u DMHO bad na kiwei ki tnat kynthup ruh ka jingdon jong u Chairman ka Umsning Town Dorbar bah Dipul Ryntathiang bad ki para member bad ki seng longkmie kiba la wan na kylleng ki shnong jong ka thain Ri Bhoi.
