Shillong, Nailar 24: U Deputy Chief Minister u Dr RC Laloo mynta ka sngi u la iathuh ba ka kabinet ha ka jingialan mynta ka sngi kala shim ia ka rai ban pynkiew ia ka bhah jong ka sorkar hapoh jong ka MeECL sha ka T.3000 klur tyngka. Kane ka long ban kyrshan ia katei ka company jong ka sorkar.
La iathuh ba ka bhah jong ka sorkar jylla ha kane ka company jong ka sorkar mynshuwa ka long T.2000 klur tyngka bad mynta la pynkiew ia ka bhah sha ka T.3000 klur. Hynrei na ka liang jong u myntri ym shym la iathuh pat la bhah ka long katno hapdeng ka sorkar bad kiwei kiwei hapoh jong kane ka company sorkar.
Ka kabinet mynta ka sngi kala pdiang ruh ia ka rule ha kaba ia dei bad ka rukom shim jaka da ka sorkar ia kaba la tip kum ka ‘Right to fair compensation and Rehabilitation Rules 2017, ia kane ka rule la shna ha dien ba ia ka ain shim khyndew ka Land acquisition act la pynkylla ha u snem 2013 da ka sorkar pdeng.
Haba ia dei bad ka jingtrei kiba hap hapoh jong ki kad lieng suin kiba don ha ki jylla na ka sorkar jong ka sorkar pdeng kala shah ia ki sorkar jylla ba kin pyntrei kam ia ka ain jong ki sorkar jylla ha kaba ia dei bad ka rukom trei kam, bad ka Meghalaya Sentential Services and Maintenance Act kan trei kam noh. Bad ki kad lieng suin kin hap hapoh kane ka ain.
