Shillong, Jymmang 31: Katkum ka rai jong ka High Level Committee (HLC) mynta ka sngi ka ophis jong ka Shillong Municipal Board (SMB) kala leit ban ai jingtip sha baroh ki briew k
iba shong ha Sweepers Colony Mawlong Hat ba kin ai jubab sha ka ophis naduh ka 03 tarik Jylliew ha duh ka 03 tarik Naitung 2019.
Ha kane ka jingsam ia ki jingtip kila don ki long iing kiba pdiang ia ka jingai jingtip na ka SMB khlem da soi bad don ruh kiba la soi ia ka jingtip kaba la ai da ka ophis. Kumba ka long mynta ki ba don ha katei ka jaka ki ia treilang bad ki briew jong ka SMB ha ka por ba sam ia ki jingai jingtip. Ia kito ki iing bym don briew la tah ia kane ka jingai jingtip ha jingkhang iing.
U Bah BS Sohlya Chief Executive Officer jong ka Shillong Municipal Board, haba kren ha ki lad pathai khubor u la iathuh ba naka liang jong ka ophis mynta ka sngi kala sam ia kine ki jingpyntip sha baroh kiba sah ha kane ka jaka kiba don kumba 300 tam ki tnum iing.
La iathuh ba ha kane ka jingsam la phah sam sha ki briew kiba sah ha ki khynriew kynhun bad 18 ngut ki nongiarap. Ha kane ka jingsam ia ki jingtip la shondur bad la ring bideo ruh halor kane ka jingai jingtip. Na kaliang jong ki Magistrate ruh kila ia don lang ha kane ka sngi.
Na ka liang jong ka SMB kan shu shim ia ka jingtip na kine ki briew kiba shong ha kane ka jaka bad ha dien ba kila ioh ia ki jubab ka kam jong ka SMB kan phah pat ia ka kaiphot sha ka High Level Committee.
