Nongstoin, Jylliew 01: President jong ka seng Congress ha ka jylla Meghalaya u Bah DD Lapang u la ong ba bun na ki nongialam ki mih na ki nongkyndong, ia kane u la kren ha ka jingplie ka jong u ia ka Auditorium Hall jong ka skul Lyngngam Presbyterian Higher Secondary School Mawthyngkut.
Ia kane ka iing la bei pisa na ka MP skhim jong ka Rajya Sabha ka kong Wansuk Syiem. Kane ka MP kala ai arphew lak tyngka bad na ka skul kala pynlut sa hynniew lak tyngka ban pyndep ia kane ka Hall kaba don kam na ka bynta ki khynnah skul.
Haba kren ha kane ka sngi kum u kongsan na ka liang jong u Bah DD Lapang ula ong ba bun sien ki nongialam ki mih na ki nongkyndong, khamtam na ki jaka kiba dang sah shrah. U la ai ka jingiaroh ia ki nongialam jong ka Lyngngam Presbyterian Higher Secondary School kiba la lah ban kyntiew ia kane ka skul haduh kane ka kyrdan bad shen kin sa plie ia ka College.
Ha ka juh ka por u bah Lapang u la kynti ia ki khynnah ba kin long kiba sngewrit bad ka jingduk jngkyrduh kam dei ban khanglad ia ki bad ki dei ban long ki khynnah ba ki briew ki lah ban shaniah. U la ong ba ia kane ka skul dei u Bah Lapang u ba la plie ha ka snem 1963 ha ka por ba u dang long Sub Inspector of School.
Ia ka jingialang la pyniaid da u u Rev P Dkhar, kiwei kiba la kren ha kane ka sngi ki long ka kong Wansuk Syiem MP, Bah M Mawsor MDC, ka kong S Iawphniaw Principal, la pynphuh ruh ia kane ka sngi da ki jingrwai jong ki khynnah skul bad kiwei.
