Shillong, Lber 07: Ki nongialam ka National People Youth Front kila pynpaw ka jingsngewnguh ia u Myntri Rangbah ka jylla u Conrad K Sangma uba la wanrah ïa ka Chief Minister’s Scholarship Scheme ha ka dorbar mang tyngka jong ka jylla.
Haba ia kren bad ki lad pathai khubor u Bah Wailadmiki Shylla uba dei u President ka NPYF u la ong ba kane ka sienjam ba la wanrah da u Myntri Rangbah ka jylla kan ai jingmyntoi ïa ki hajar ngut ki samla pule ha kylleng ka Jylla Meghalaya.
Shuh shuh u Bah Wailadmiki Shylla u la ong ba kane kane ka jingpynbna ha ka jingkren mang tyngka jong u Myntri Rangbah, ka jingthmu ka long ban ai jingkyrshan pisa sha ki 80,000 ngut ki samla pule hadien ka matrik naduh u snem mang tyngka ban wan.
“Hapoh kane ka skhim, wei pa iwei lada dei u ne ka samla pule kin ioh ia ka jingiarap kaba ₹6,000 man la u snem ha ka jinglut jingsep ha ka pule puthi, kaba pynskhem ia ka jingangnud jong ka sorkar ban pynkup bor ia ki samla lyngba ka jingpule kaba lah ban ioh” ong u Bah Wailadmiki.
