Shillong, Rymphang 03: U Chief Executive Member (CEM) jong ka Khasi Hills Autonomous District Council (KHADC) mynta ka sngi u la khot ia ka jingialang jong baroh lai tylli ki District Council ha ka jylla ban ia kren ia ka Assam and Meghalaya Autonomous District (constitution of the District Council Rule) 1951 ia kaba la tip kum ka AD Rule, kyrpang halor ka rule 128 kaba shah ia bym dei ki trai jyla ban ia shim bynta ha ka MDC Election.
U bah PN Syiem haba kren ha ki nongthoh kubor ha dien ba la wai ka jingialang u la ong ba, ka jingiakren mynta ka sngi ka long ba kila ia mir jingmut halor ka Rule 128 jong ka Assam and Meghalaya Autonomous District (constitution of the District Council Rule) 1951 kumba la pynkylla. Ha kane ka jingialang kila shim ia ka rai ban thung ia ka Constitutional Expert ban pule bniah ia kane ka rule bad ai ia ka jingmut jong ki sha ka ADC.La ong ba ynda la ioh ia kane ka jingai jingmut yn sa khot biang ia ka jingialang ban ia kren ha kane ka phang.
Ha kane ka jingialang kaba la long mynta ka sngi kiba la poi ki long tang na ki ar tylli ki District council ka GHADC ha kaba la wan da u CEM u Denang T Sangma bad u Dy CEM u Augustin Marak bad ki ophisar na ka liang jong ka JHADC la lam khmat da u CEM ban PN Syiem u ba la pyniaid ia ka jingialang ha ryngkat ki para MDC, katba na ka liang jong ka JHADC kaba la ialam da ka seng Congress ym shym don ba wan sha kane ka jingialang.
Ka kong B Basaiawmoit Secretary jong ka Executive Committee jong ka KHADC kala iathuh ba na ka liang jong ka JHADC kila pyntip ba kin nym lah ban poi sha kane ka jingialang namar ba kila don lypa ki jingialang kiba la dep buh hapoh jong ka JHADC.
