New Delhi, Nailar 18: Mynta ka sngi u President jong ka Ri India u Ram Nath Kovind u la thung ia u Satya Pal Malik kum u Lat ba thymmai jong ka jylla Meghalaya, u dei u Lat jong ka jylla Goa bad la pynkynriah ia u sha Meghalaya.
Ha kane ka juh ka jingpynbna ia u Lat ka jylla Maharashtra u Bhagat Singh Koshyari la buh ba un peit ruh kum u Lat jong ka jylla Goa nalor ka kam ba u la don bad kane ka jingthung thymmai kan trei kam na duh ka sngi kaba la shimti ia ka kam.
U Lat ba mynta jong ka jylla Meghalaya u Tathagata Roy u la wan shimti ia ka kam kum u Lat jong ka jylla ha u snem 2018, shuwa ba un wan sha ka jylla Meghalaya u la long u Lat jong ka jylla Tripura. Ka por jinglong Lat hapoh ka jylla kala kut ha ka 20th Jymmang 2020 hynrei na ka daw jong ka jingdon kane khlam COVID-19 u la beteng ia kane ka kam kum u Lat haduh mynta ka sngi.
