Shillong, Rymphang 03: Ka Meghalaya BJP state Unit, mynta ka sngi kala dawa ba u Chief Minister u Dr Mukul Sangma u dei ban hiar shuki mar dor, ha dien ba ka iing bishar kaba ha khlih duh jong ka Ri India kala ai ia ka rai ba ka kam MDC kam dei ka kam ba ioh jingmyntoi, kane kala kdew shai ba ka sorkar kala wanrah ia ka ain ba bakla hapoh ka iing dorbar, kane ka jingle ka long ban pynduh noh ia ki District Council.
Haba kren sha ki nongthoh khubor mynta ka sngi u Bah Shibun Lyngdoh bad u Genenral Secretary jong ka seng u Bah David Kharsati kila kynnoh ba u myntri rangbah u la wanrah ia kane ka bill, The Prevention of Disqualification (Members of Legislative Assembly, Meghalaya) (Amendment) Act, 2015 ban pynlong ai ia ka hapoh ka iing dorbar ia kaba la leh da ka sorkar kaba la ialam da ka seng Congress MUA-II ka long ban pynduh pyndam ia ki District Council.
Ka seng BJP ka pynpaw ia ka jingsngewnguh ia u Bah PN Syiem u ba la ia khun pyrshah ia kane ka ain bad kum juh ia ka kong Agnes Kharshiing kaba la ai ia kane ka muktduma, lyngba kane ka mukotduma kala pynshai paidbah ia ka jingbakla jong katei ka ain kaba la wanrah da ka sorkar ba la ialam da u Dr Mukul. Ka rai jong ka iing bishar ba don burom kaba ha khlieh duh jong ka Ri India ba ka kam MDC kam dei ka kam bam ar maloi, kala kdew shai ba katei ka ain kala iap, kam ki nongialam ka BJP.
Da kaba pdiang ia katei ka ain ka pynlong ba na ki phra ngut ki MLA kiba long ruh ki MDC, hynniew ngut na ki kila hiar shuki bad kane kala wanrah ia ka election MDC shiteng samoi bad ka jinglut kala kot sha ka ar klur tyngka ka pisa jong no kane ka dei ka jingo paidbah, kane ka jingleh ka sorkar kala pynsyrwai ia ka pisa paidbah bad u Dr Mukul u hap ban shim ia ka jingkit khlieh ia kane.
U Bah David Kharsti u la ong ba, ha ka jingshisha ka iing dorbar ka dei ban pass ia ka ain bad ka iing bishar kan batai halor jong ka ym ba ia ka ain kaba la pdiang da ka iing dorbar yn shah pynrem hapoh ka iing bishar, u Bah David u la kdew shai kdar kaba ka kyndon kaba hynriew jong ka ADC ka ong ba u MDC yn long tang san snem, Ka BJP kan sa bud dien ia kane ba kane ka ain kan long kaba la iap.
