Shillong, Nailur 17: U Lamphang jong ka All Garo Joint Action Committee (AGJAC) u Nikman Marak u ba la wan na Tura ban ia shim bynta ha kane ka jingialang jong ka CoMSO, u la ong ba kane ka jingeh ha kaba ia dei bad ka jingwan rung kyrthep ki briew ban a bar kam dei tang ha Khasi Hills hynrei ka jia ruh ha Garo Hills.
Ha ba kren ha kane ka jingialang paidbah u la ong ba kane jingsngewkhia halor ka jingwan rung ki briew ba na bar kam dei tang ha kane ka jylla Meghalaya hynrei ka dei ruh ia ka dong shatei lam mih ngi jong ka Ri India baroh kawei.
U la ong ruh ban kham shai ka khubor ba kan leit sha u myntri rangbah ka jylla u Conrad K Sangma u la ong ba un kren da ka ktien Garo. Ha kane ka jingkren u la ong “ U Conrad u dei u Garo bad u dei na Meghalaya, u dei ban pyntrei kam ia ka jingdawa ILP ha ka jylla”.
U la ong ba ka jingdawa ia ka ILP kam dei tang ha Khasi Hills hynrei ka dei ruh ha Garo Hills, kumta ka jingdawa ia ka ILP ka long ha baroh kawei ka jylla, u la ong ba ka sorkar ka dei ban pynlong ain noh ia ka ILP kumba la dawa ka CoMSO.
