Shillong, Iaiong 16: U General Secretary jong ka ALL Meghalaya SSA School Association, Garo Hills Unit u Sengphan K Marak u la ong ba ia ka shithi kaba la phah sha u Chief Minister jong ka jylla u Dr Mukul Sangma kumba la paw ha ki lad pathai khubor mynta ka sngi kam dei kaba la soi da u president bad u secretary jong ka All Garo Hills SSA School Teacher Association (AGHSTA).
Haba kren ha u SP News Agency lyngba ka phone u General Secretary jong ka AMSSASA Garo Unit u Marak u la ong ba ia ka shithi la soi da mano re mano, Hynrei u la pynthikna ba u president u Spickson Sangma bad u secretary u Benabith Marak ki khlem soi ia katei ka shithi, bad na ka liang jong u ruh u General secretary u khlem soi.
Naka liang jong u Marak u la ong ba ia kane ka kam leh leh da ki katto katne ngut ki nonghikai, ym da ka seng, na ka liang jong ka seng ruh mynta kala ioh jingtip ba la don ki nonghikai kiba leh ia kane ka kam bad leh se da ka don kam ruh kin hap ban pynmih ia ka kyrteng jong ki namar kane ka jingleh kala wanrah ia ka jingklumar jingmut ha ki para nonghikai.
Na ka liang jong u president jong ka seng u Bah Aristotle Rymbai, haba kren ha u SP News Agency halor katei ka shithi u la ong ba kiba phah ia ka shithi ki dei ban da soi bad ai ia ka kyrteng ba pura jong ki, hynrei kumba ka long mynta kane ka shtihi la shu soi bad thoh president bad secretary.
Kane ka jingmih kynsan kane ka shithi kala pynkulmar jingmut ia ki nonghikai SSA kiba la shim ia ka rai ha ka jingiaid paidbah ka jong ki ha ka 12 tarik ha nongbah Shillong ba kin pynlong ia ka jingiakhih kaba tyngeh da kaba sangeh leit hikai naduh ka sngi ba ar ka 18 tarik mynta u bnai kaba khlem buh por.
