Shillong, Iaiong 23: U member ka parliament (MP) ka Rajya Sabha u bah W R Kharkukhi, u la ong ba ka jylla ka donkam ia ka liang pyrshah ka ban tei, bad haba peit ia ka jingkyntait ka Voice of People Party (VPP) ban shimbynta ha ka jingialang ban iakren halor ka Railway Project, ym lah ban sngewthuh shuh la ka dei ka liang pyrshah ka ba ïatei ne ba pynjulor.
Lah ban kdew hangne ba na ka liang ka sorkar ka la pynbna ban thaw da ka All Party Committee ban iamir jingmut halor ka jingthmu ban wanrah ia ka Railway project ha Khasi Jaintia, hynrei na ka liang ka Voice of People Party (VPP) ka la pyntip ba kan ym treh ban shimbynta ha kane ka Committee.
Haba kren sha ki nongthoh khubor ha ka 15 tarik ïaiong u la ong halor kane ka VPP ka don la ka jong ka jingpyrkhat, hynrei ka jylla ka donkam ia ka liang pyrshah ka ba iatei bad da ka jingkyntait jong ka ban leit shimbynta ha ka Committee ban ia kren halor ki mat jong ka jylla, ka dei ka jingtei ne ka jingpynjot ym lah ban tip.
U la ong ruh ba ka Railway Project ha ka Ri Khasi Jaintia ka la kut katkum ka jingsngewthuh jong u namar ba ka sorkar ka la dep ban pynphai ia ka pisa, namar ym lah shuh ban tip hadien katno yn dang ioh pat ia ka mang tyngka sa shisien, shisien ba ki la pynphai ia ka pisa ka la jwat ban ioh pisa.
Halor ka jingdawa ka VPP ban thung da ka jingtohkit halor shah rem ha Jaintia u la ong ba ka jingpan ia ka jingtohkit halor ka jingshah rem ha Jaintia Hills, ka long kaba lyngngoh namar lada ka VPP ka shah rem ka long ka bymiaid hok, hynrei lada ki jop, ka biang lut, ka don ruh ka jingkynnoh na ki, ba ki la shah rem namar ka jur ka jingshah thombor, hynrei u don ka video kaba pyni ia ki ing jong u nongkyrshan ka NPP u ba la shah thombor bad shah kawang maw, da ki nongkyrshan jong ka VPP.
U Dr. Kharkukhi u la ong ruh ba ymshem la iohi kata ka jingpynrem kaba mih na ki nongialam jong ki, ki ba kam ba ieid jaitbynriew bad kumno ki kynnoh ba ki shah thombor, kane kam dei kaei kaei hynrei ka kam runar kaba ka VPP ka kyrshan pura.
