Shillong, Iaiong 02: Ka Khasi Students’ Union (KSU) ka pynbna ba ka seng kan rakhe ia ka Sngi Kyrsiew Ri lane ka Khasi National Awakening Day ha ka 4 tarik u Iaiong 2017. Ka phang pdeng jong kane ka jingrakhe mynta u snem ka long’ “Ngi Pyrshah ia ka Jingtih Uranium”.
Kiwei kiwei ki phang pat kin kynthup ia ka Lynti rel, kam pynbeit pud, bad ki kam ba ia dei bad ka pule puthi. Ka seng ha katei ka sngi kan pynlong ia ka jingiaid paidbah naduh Urkaliar, Demseiniong haduh ka ophis treikam jong ka Atomic Minerals Division, Nongmensong ha ka por 12 baje mynsngi.
Ynda la poi ha katei ka ophis ka seng kan pynlong ia ka prokram ba lyngkot ha kaba yn bud pat sa ka jingthang ia ki tyngshop. La ong u Bah Donal V. Thabah General secretary jong ka seng ha ka kyrwoh kaba la phah mynta ka sngi.