Shillong, Lber 24: U Justice (retd) BP Katakey, u ba khlieh ia ka Committee ba thung da ka Meghalaya High Court hynne ka sngi u la pan jingshai halor ka kaiphod ba la leh Surbey na suiñ lane ka (Aerial Survey) ba la pynlong hapoh ka shi kilometer Radius jong ki jaka lum dewiong.
Iaka Survey na suiñ (Areal Survey) la leh ha ki 4 tylli ki District kata ha East Jaintia Hills, West Khasi Hills, South West Khasi Hills bad ha South Garo Hills.
U Justice Katakey haba kren sha ki lad pathai khubor hadien ka jingialang, u la ong, la bthah ia ka Sorkar ba kan pynlong ia ka Aerial Survey hapoh ka shi kilometer radius jong ka jaka lum dewiong. Ka Sorkar ha u 2019 ka la ai ia ka affidavit hapoh ka iingkashari Surpreme Court ba pyni ia ki jaka ba lum ia u dewiong.
“Ngi la bthah ban leh ia ka survey lait noh ia u dewiong bala dep shim jingkhein. Ngi kwah ban iohi la hapoh kane ka shi kilometer radius u don ne em u dewiong bym pat dep shim jingkhein” U la ong.
U la ong ba ia ka kaiphod la dep ban aiti ha ka 19 tarik Lber bad ka jingïalang hynne ka long thik ban pan jingpynshai haba iadei bad ka kaiphod. “Nga la bthah ia ki ba kin ai ha nga ia kita ki jingpynshai hapoh 1-2 sngi ban wan”
Halor ka jingujor ba la mudui da ki 4 ngut ki briew pyrshah ia ka kam tih dewiong be-ain ha South Garo Hills, u Katakey ula ong ba ka kaiphod jingtohkit ia kane ka kam la dep ban aiti da ka Committee kaba khlieh da u Naba Bhattacharjee sha u.
“Naba ki dang don ki jingtohkit ba hap ban leh, ka Sorkar ka la bthah ia u Deputy Commissioner ka South Garo Hills ban pynlong ia ka jingleit pynshisha bad aiti ia ka kaiphod hapoh ka shitaiew. Kumta, ia ka kaiphod ngi khmih lynti ban sa ioh hadien shitaiew” ula bynrap.
Halor ka jingsdang jong ka jingtih dewong da ka jingstad saian ha Meghalaya, u Katakey ula ong “Ka dei ban don ka bor ka ban khmih ia kane. Ym don ba lah ban batai ba ka lah ban don ka jingtih dewiong be-ain ha Meghalaya hynrei kawei ka kam kaba la iathuh ia nga ka long ba ha ka jingai jingbit bad kano kano ka jingbit ba la ai ban tih dewiong da ka jingstad saian, ka don ka kyndon kaba ngam pat iohi hynrei la iathuh ia nga ba ia ka jingkitkhlieh la tynrong ha ki nongtih dewiong ba kin tap lut ia ki thliew ba hapoh ka shi kilometer radius na ka jaka ba ki trei”.
U la ban jur ba uno uno u dewiong bala shem shabar jong ka depot ba la buh da ka Coal India Limited (CIL) u dei uba be-ain hangne ha Jylla Meghalaya.
